ನಿನ್ನ ನೆನಪು

ಮುಂಜಾವಿನ
ಮಂಜಿನ ಮೇಲಿಂದ
ತೇಲಿ ಬರುವ ತಿಳಿಗಾಳಿಯಲ್ಲಿ
ನಿನ್ನ ನೆನಪು

ನೀಲಿ ಆಕಾಶದಲ್ಲಿ
ತೇಲಾಡುತ್ತ ಸಂಭ್ರಮಿಸುವ
ಮೋಡಗಳ ಒಡಲ ತುಂಬೆಲ್ಲ
ನಿನ್ನ ನೆನಪು

ಫಲವತ್ತತೆಗೊಂಡ
ಮೋಡಗಳ ತೆಕ್ಕೆಯಿಂದ
ಬಿಡಿಸಿಕೊಂಡು ಭುವಿಗೆ ದಾಂಗುಡಿಯಿಡುವ
ಹನಿ ಹನಿ ಮುತ್ತಿನ ಬಿಂದುಗಳಲ್ಲಿ
ನಿನ್ನ ನೆನಪು;

ನೀರ ಮುತ್ತಿನ ಹನಿಗಳ
ಸ್ಪರ್ಶ ಸುಖದಿಂದ
ಭೂತಾಯಿ ಒಡಲಲ್ಲಿ
ಪಲ್ಲವಿಸುತ್ತ ಹೋಗುವ
ಬೀಜ ಬೀಜಗಳಲ್ಲಿ
ನಿನ್ನ ನೆನಪು

ಓಲಾಡುವ ಸಸಿಗಳಲ್ಲಿ,
ತೊನೆದಾಡುವ ಬೆಳೆಗಳಲ್ಲಿ,
ಭ್ರಂಗದ ಸಂಗೀತದಲ್ಲಿ
ನಿನ್ನ ನೆನಪು

ಚಿಟ್ಟೆಗಳ ಚಂಚಲತೆಯಲ್ಲಿ
ತರುಳತೆಗಳಲ್ಲಿ, ಹೂಗಿಡಗಳಲ್ಲಿ
ಹೂಗಂಧ ಸೂಸಿ ಬರುವ
ಗಾಳಿಯಲ್ಲಿ,
ಬದುಕಿಗೆ ಮುನ್ನುಡಿ ಬರೆಯುವ,
ವಿದಾಯ ಹೇಳುವ ಬೆಂಕಿಯ ನಾಲಿಗೆಯಲ್ಲಿ
ನಿನ್ನ ನೆನಪು

ಬಯಲುದಾರಿಯಲ್ಲಿ, ಬಾನಂಚಿನಲ್ಲಿ
ದಿಗಂತದ ವಿಸ್ಮಯದಲ್ಲಿ
ನೋವು ನಲಿವು, ಏಳು ಬೀಳು
ಸುಖ ದುಖಗಳಲ್ಲಿ
ಅಳಿಸಲಾಗದ ಶಾಸನ
ನಿನ್ನ ನೆನಪು

* ಉಮಾತನಯರಾಜ
ಹುಬ್ಬಳ್ಳಿ
೧೦-೦೭-೨೦೧೦